WorldKurd Organisationڕێکخراوی جیهانی کورد
چاوپێکەوتنی هەیئەتی رێکخراوی جیهانی کورد لە پارڵمانی وڵاتی سۆئید لەگەڵ ژمارەیەک لە پارڵمانتارانی حیزبی سۆسیال دێمۆکراتی سۆئید
رۆژی پێنجشەمە ڕێککەوتی ١٣-٤-٢٠٢٣ هەیئەتێک لە ئەندامانی رێکخراوی جیهانی کورد لە گەڵ بەشی پەیوەندییە دەرەکییەکانی حیزبی سۆسیال دێمۆکرات کۆ بوونەوە. لەو دانیشتنەدا چۆنێتی کاروچالاکی رێکخراوی جیهانی کورد و ئامانجەکانی، کوردستان تریبووناڵ و بەدۆکۆمێنتکردنی تێرۆری جیابیران لە کۆماری ئیسلامی ئێران، سەرکوت و زەبروزەنگ لە کوردستان و ئێران، چۆنێتی مامەڵەکردن لەگەڵ کۆماری ئیسلامی، بەتایبەت کە ئێستا وڵاتی سۆئید بەرپرسی دەورەیی پارڵمانی یەکییەتی ئوروپایە، بارودۆخی رۆژهەڵاتی کوردستان و ئێران، شۆڕشی ژینا و بەرهەڵستکاری کۆمەڵگا بە شێوەی جۆراوجۆر بەدژی کۆماری ئیسلامی ئێران، چۆنێتی سەرپۆشی زۆرەملی و دەرمانداوکردنی خوێندکارانی کچ لە خوێندنگاکان و گۆڕانکارییەکانی پاش شۆڕشی ژینا خرانە بەر باس و لێدوان .
لەم پەیوەندییانەدا کۆمەڵێک بەڵگە بۆ زانیاری زیاتر و تێگەیشتنێکی گشتی لە باروودۆخی ئێستای کوردستان و ئێران خرایە بەر دەستی هەیئەتی خانەخوێ کە پێکهاتبوون لە: بەڕێزان یوهان بۆشر، خاتوو لینیا ویکمان و خاتوو ئازرا مۆرانوڤیچ . هەیئەتی پارڵمانی حیزبی سۆسیال دێمۆکرات لەبەشی پەیوەندیە دەرەکییەکان ، بەڵێنیان دا کە ئەم چاوپیکەوتنانە لە دانیشتنێکی بەربڵاوتردا بەردەوام بکرێ و لەداهاتوودا پلانی بۆ دابنرێ کە لەگەڵ هەموو ئەندام پارڵمانتارەکانی بەشی پەیوەندییە دەرەکییەکان چاوپێکەوتن بکرێ.
هەیئەتی ریکخراوی جیهانی کورد کە پیکهاتبوون لە خەزاڵ کەرەمی، ئێقباڵ سەفەری و کیاڕەش شاسواری، سەرەڕای سپاس و پێزانین بۆ ئەو چاوپێکەوتنە دۆستانەیە، داواکار بوون کە ئەم بابەتانە لەگەڵ ئەندام پارڵمانەکانی تریش بیننە بەرباس و وڵاتی سۆئید وەک بەڕێوەبەری دەورەی پارڵمانی یەکییەتی ئورووپا ، رۆڵی خۆی لە بەتێرۆریست ناساندنی سپای پاسداران بگێڕێ.
لە کۆتاییدا یوهان بۆشر لە ئینستاگرامی فەرمی خۆی نووسییوێتی: لە چاوپێکەتینێکدا لەگەل چالاکانی مەدەنی بە چڕوپڕی قسەمان لە سەر باروودۆخی ئێران کرد و ئێمە وەکوو سۆسیال دێمۆکراتی سۆئید داوا لە حکوومەتی سۆئید ئەکەین سپای پاسداران بخاتە لیستی تێڕۆرەوە.
