WorldKurd Organisationڕێکخراوی جیهانی کورد
به‌یاننامه‌ی شماره‌ی یه‌ک رێخراوێ جه‌هانی کورد
خه‌ڵک شه‌ریف کورد له رۆژهه‌ڵات کوردستان هه‌ر ئه‌و جووره ک ئیوه‌ش چۊ جه‌هانییه‌یل ئاگادارین له رێکه‌فت ۲۵ سپتامبر ساڵ ۲۰۱۷ زایینی به‌رانبه‌ر وه گه‌رد ۳ ره‌زبه‌ر ۱۳۹۶ هه‌تاوی له هه‌ریمی کوردستان باشور گشت پرسی ئه‌را سه‌روه‌خوویی له وڵات عه‌راق وه ڕێیه‌وه چوودن .
خوه‌ر عاڵه‌م تاو وه دۊای ده‌وره‌ه‌یگ دۊر و دریژ و سه‌خت ئڕا خه‌ڵک پاک به‌ین و نه‌هره‌ین جاریگ تر هه‌ڵاتییه و سرووشت ڕه‌نگین کوردستان وه گه‌رد خۊن جوانه‌یل دڵدارێ جارێگتر گۆڵ ئازادی په‌روه‌رانێیه.
خه‌ڵک کورد له هه‌ریم کوردستان له دۊایی سه‌ختی و کیشه‌یل فه‌ره و خۆڕاگیری بێ هاوتا له وه‌رانوه‌رێ له‌شکه‌ر په‌لیدی و ڕه‌شی٫ ئی ده‌رفه‌ت زه‌ڕینه وه ده‌س هاوردنه تا بتۊه‌نن دۊای یه‌ی سه‌ده ، سنووره ده‌س کردگان ک بێ هۊچ بنه‌ماییه‌گ مێژووی نه‌ته‌وه‌یی مافی مرۆڤی له ژێر ناو ڕێکه‌فت سایس پیکو تاریف و وه زوور وه ڕێیه‌و چی ، له یه‌ک بشکنن و به‌شێگ له سنووره‌گان میلکان داڵگیمان یانی میلکان خوه‌ر جاریگتر وه گه‌رد عشق و ئنسانییه‌ت تاریف بکه‌ن.
ڕێخراوه جه‌هانی کورد وه‌گه‌رد پاڵپشتی گشت لایانه‌ی خوه‌ی له وه‌ڕێیه‌و چینه ڕفراندۆم و ماف چاره‌ی خوه‌ی نۊسین نه‌ته‌وه‌ی کورد ئڕا سه‌روه‌خوه‌ی ، چووده پیری ئی ڕۊداوه گرینگه وه ئی مۆهمه وه خه‌ڵک کورد و کوردستانییه‌گان پیرۆزبایی ئۊشێد وه ئی ڕۊداوه بماره‌که سه‌ره‌تایگ ئڕا وه دی هاتن ماف بێ ئی لاو ئه‌ولا وه خه‌ون مۆقه‌ده‌س پێشه‌وا قازی مۆحه‌ممه‌د و گشت کوردیگ له هه‌ر کووره‌ی جه‌هان زانید.
ڕێخراو جه‌هانی کورد گشت خه‌ڵک کورد له رووژهه‌ڵات و وه تایوه‌ت شاره‌گان لورسان ، ئیلام و کرماشان داوه‌ت که‌ید ک وه‌گه‌رد پشتگیری که‌مپه‌ین سۊر ئاڵا وه گه‌رد شادی ، هه‌ڵپه‌رگه ، له‌وه‌ر کردن جل کوردی وه به‌شداری له شوونه گشتییه‌گان وه گه‌رد شادی کردن و شیرین داین له ئیواره‌ی رووژ ڕفراندوم، سه‌ره‌تای ره‌سین وه مافه نه‌ته‌وه‌ییه‌گه‌ی خوه‌یان جه‌ژن بگرن تا وه‌گشت جه‌هانیه‌یل وه تایوه‌ت وه ده‌سه‌ڵاتداره‌یل زاڵم ناوچه‌گه نیشان بییه‌یمن ئی ڕێ مۆقه‌ده‌س و بمارکه دریژه دیمن و ئڕا دیاری کردن سنووره‌گان میلکان داڵگیمان چۊ زاگروس خۆڕاگیر و چۊ قه‌ندیل سه‌ربه‌رزیمن .
سه‌روک رێخراه‌ی جه‌هانی کورد
سوهه‌یلا داوودیان که‌ڵهور